25/01/12
ذكرياتي القديمة والجديدة :(:)
# الاتوبيس ماشي و السكة فاضية.... فاضية.. فاضيــــــة و فجأة الشارع طفح عربيات و بقت العربيات عاملة زي ما تكون صراصير طالعة من البلالايع....يععععععععععع......ايه القرف ده!!
# فـ وقت كده فـ ثانوي كنت بقيت شاطرة في النحو كنت بقدر اعرب القطعة كلمة كلمة وحرف حرف مش بس التلات كلمات اللي تحتيهم خط، بابايا جابلي مدرس قريبه يراجع معايا فـ الراجل انبهر....الغريب ان فـ الامتحان و فـ كل امتحان بردو كنت بغلط في اعراب التلات كلمات اللي تحتيهم خط!!
#
دربكة: نويتي؟
دربكة: نويتي؟
انا: نويت ايه؟؟
دربكة: نويتي عالرحيل؟!!!!!!!!!!!!!!!!
# بعد ما مامتها زعقتلها عشان تسمع الكلام سكتت و هديت و يمكن زعل كتير.....رميتها بنظرة تخطيفي من بين الخيوط...زعلت شوية و بدأت تتكلم ببراءة الاربع سنين اللي هما كل عمرها وسكتت...سرحت للحظة و بعفوية مفاجأة مسكت ايد مامتها وباستها...
# دربكة بعد كلام كتيييييييييييييييير اوي: يـييييييي ده انا نصيبــــة...
انا : نصيبة؟!!
دربكة: اه نصيبة...ماليش حل!!
انا: مممم.... زي شماتة كده...قصدى شمت طبعا!! طاااااايب.....
# كان شكله مش طبيعي فعلا، و بعد ما كل واحد فينا خمن تخميناته لقيتني بسأله فعلا.......لأ في ايه بجد؟ انت كويس؟!!
(ده القمر على فكرة)
#
- دربكة: اقولك حاجة تضحك بقى طيب؟؟
- دربكة: اقولك حاجة تضحك بقى طيب؟؟
- انا: اتفضل......
- دربكة: وانا جاي في الميكروباص واحد قاللي: كابتن.. انتخبت ولا لسا؟ قولتله لسا...قاللي: طاب هاتنتخب حزب ايه...قولتله: حزبي الله ونعم الوكيل.... الميكروباص كله ضحك و لقيت واحد بعدها بيقوللي :انت نازل فين يا نجم!!!
# ان لم تفعل ما تحب، فأرجوك حاول تفعل ما تحب قبل ما تقول يا ريتني كسبت شرف المحاولة مرة و اتنين ومليون، هيا دي الطريقة الوحيدة اللي هاتخليك تحب ما تفعل من قلبك من غير ماتكدب على نفسك قبل ما تكون بتكدب عالناس.......
# ياريت نبطل نتكلم بأسم الدين كلام مش فاهمينه، وياريت اللي شايف الحرية معناها ان من حقك تشتم الناس براحتك بس ماتضربش حد على قفاه يخليه عارف ان الاتنين في الاخر تجريح وذنوب.......
# نفس اللي حصل مع ساويرس حصل مع نادر بكار حصل مع الراجل اللي قتل 99 و لما حب يتوب قالوا له "لأ مالكش توبة" فكملهم 100، فمحدش يزعل من ساويرس"اللي هو مش مسلم ومش عارف الاسلام" لما يخاف من المسلمين اللي ماسمحوش في صورة شيرها، ماحدش يزعل لما ياخد كل المواقف اللي احنا بنشوفها تخلف، ومحدش يزعل من السلفي لو اتراجع عن النزول مادام مش مصدقين اسفه، ومادام مش عارفين نسامح ياريت نبطل نتكلم بأسم الدين كلام مش فاهمينه، وياريت اللي شايف الحرية معناها ان من حقك تشتم الناس براحتك بس ماتضربش حد على قفاه يخليه عارف ان الاتنين في الاخر تجريح وذنوب....... يا ريت كل واحد يتعب نفسه شوية و يفكر، شوية زوغيرة ماتوصلكش للجنان...
# بتنرفز جدا على نفسي لما اعمل حاجة سخنة عشان اشربها وانساها جنبي لحد ما تبرد...... يمكن عشان كده بقيت اتنرفز كتير!!!
# كل مرة فكرت فيها لو كان ينفع اغير اسمي، مالقيتش ولا اسم نافعلي...يمكن ولا حتى اسمي ذات نفسيه!!!
# دربكة: فين أيام زمان؟ أيام ما كان الجنيه تمن تنصاص؟!! دلوقتي بقوا نصين بس!!
# ساعات بحس ان ممكن ادفع اي حاجة عشان اتلسع من الشمس في عز برد الشتا... وده بيفكرني ان الكلية كانت في الشتا مقسومة نصين; نص شتوي برد وهوا، و نص صيفي كله لسعات شمس دافية، كنت بحب النص الصيفي مع انا وصوحابي محل اقامتنا في النص الشتوي اكتر! عشان كده كنت بروح كل شوية اتلسع في النص الصيفي وارجع تاني!!
# ده بقي بيخليني افكر في مشروع شتوي زوغير ومحندق كده قايم علي فكرة اننا نعبي اشعة الشمس دي في اختراع شبه الازايز، و نوقف واحد يبيعها ويبقي اسمه "بياع الشمس"... بس نجاح المشروع هيتوقف علي كم الناس الذي عايزة تاخد لسعة شمس..!
# دربكة: انا بقى امي كانت عايزة تجوزني على كيفها ، زي اخواتي يعني، كلهم كانوا نفس اللقطة، بس انا قولت لأ، اتجوز واحدة ماعرفش دماغها ازاي وهاتفهمني ولا لأ!! كانت عايزاني اتجوز واحدة من عندنا في البلد، بتقوللي هاجوزك واحدة ماشافتش الأسفلت!!! في الاخر خطبت على مزاجي بردو...
# دربكة: بصي هما في الاخر كلمتين ابرك من عشرة، هيا طولها زي عرضها، و هما لو يعرفوا كده ماكنش حد عمل حاجة وحشة فحياته، وفي الاخر كلنا رايحين زي ماجينا ومابيبقاش منا غير السيرة!!
# دربكة: بيقولك اللي ماعلموهوش أمه وأبوه بتعلمه الدنيا.....(صمت)....المهم انتي عاملة ايه دلوقت؟!!
# وافتكرت مرة يوم..ركبت فيه المترو، مش مترو الانفاق، لأ المترو "الترام" ابو ربع جنيه ايامها، وكنت راجعة من درس مش فاكرة مادة ايه.... ركبوا شباب وبنات ممكن نقول عليهم اولاد وصبايا زوغيرين، لابسين لبس مدرستهم، كان كل كلامهم بلغة الاشارة، وكان شكلهم مبسوطين..وكانوا بجد مبسوطين، ومع اني مش كنت فاهمة ولا اي حاجة بيقولوها لقيتني غصب عني ببتسم.. ابتسامة واسعة زيهم وكأني فاهمة اللي بيتقال....مع اني مافهمتش غير ان الفرح والحزن احساس..مش محتاج لكلام و عيون...
# من الحاجات اللي ندمت عليها... ايام ما كنت بعتبر الامتحانات لعبة ولازم اجيب فيا سكور عالي عشان اعرف اختار على مزاجي..و في الاخر كنت اجبن من اني ادافع عن اختياري و سيبتهم يختارولي..اقنعت نفسي ان انا اللي اخترت... وسرقت حلم حد تاني يمكن كانت امنية حياته انه يكون في مكاني في التنسيق... وسكت كأني ما اجرمتش.... ودلوقت عرفت اد ايه احساسها صعب ان احلامي تتسرق مني.....
# هم يضحك وهم يبكي... وهم يتعمله لايك وهم يتنفضله عشان مايبقاش هموم....!!
# زي ماتكون السما منورة بلمبة نيون متصنفرة، وكأن الشمس لما حاولت تبعت نورها لمس الضي طرف السما وفجأة...غيرت رأيها... ماشي يا شمس!!
# طول عمري بحب القلم الرصاص اكتر من اي قلم جاف، يمكن عشان أثاره اقل لو اتمسح.. لكن الحاجات اللي بتتكتب جوانا عمرها ما بتتمسح وبتفضل اثر نفسها بنفسها.... وفي الاخر مافيش حاجة بتطلع في الغسيل...!!
# من سذاجتنا كنا فاكرين ان كل حاجة سهل نشيلها ونمسحها بطراطيف صوابعنا... جربناها في كراريس الواجب لحد ما خرمنا ورقها من الكحت...وفضلنا نشيل كل حباية وتعويرة نتعورها في ركبنا لما نجري ونتكعبل في حتة زلطة وقعتنا فيوم عالارض... وكل مرة كنا نشيل مكان تعويرة نلاقي دم جديد وجرح جديد... لحد ما اتعلمنا مرة ان الجروح عمرها ما تروح غير لما نسيب الجرح ينشف ويقشر عن جلد جديد... وتسيب اثر من غير ألم، وتسيب وجع جوانا كل ما نشوف الأثر.......اللي عمره عمره ما بيروح!!!
# عارفة انها حاجة مستفزة....بس بجد مفتقدة ايام الامتحانات وقهوة الصبح اللي بتتشرب من غير ما عينيك تفارق الورق، ودخل اللجنة متدهول وكأنك شاكك ان صح هو ده المكان.. وحاسة بتوتر فظيع كأن عندي امتحان شغال دلوقت وانا نسياه و ماذاكرتلوش......ربنا يستر
# افتكرت يوم الشفوي لما دخلت امتحن عند دكتور فادي وكنت في قمة الاحباط: يا دكتور انا مش عارفة الامتحان بجد غرييييييييييب، مش منطقي يمكن، مش عارفة انا عملت ايه عشان اقيم اي حاجة...مش عارفة ايه صح و ايه غلط....مش فاكرة حتى الاسئلة اللي من صعوبة فهمها صعب استرجعها في عقلي، كل اللي فاكراه ان الورق كان كتييييير بس لو حتى زاد وقت الامتحان 10 ساعات مش هاحل حاجة اكتر!! وقمة استغرابي...ان الدكتور كان متضامن معايا ومتفق في كل حرف، سبحان الله..... هو مين اللي كان حاطط امتحان السيوتيكال ده!! يعني ايه سيوتيكال اصلا!!!!!!!!!!!
# فطًّ الصابون و تنطط تنطيطًا...كاد الصابون ان يكون عبيطًا....يا حلولي!!
# لو في مرة مشيت في سكة وكان الجو هادي... ولقيت قطة ماشية وراك، ماتخافش وماتكملش..جايز تكون قطة عمية ماشية ورا صوت خبط رجلك في الارض عشان مش عارفة تسمع غيره... لو كملت طريقك للشارع العمومي يمكن تموت تحت اي عربية ماشية بسرعة...!!!
# من وقت كتير مش شوفتها كده، شكل السحاب هش اوي مع انه متحمل يا عيني مطر كتير، ورسملي شكل باخرة و عربيتين بيتسابقوا و تمساح شرير فاتح بقه و واحد بيجري مع انه واقف، وفجأة بتتقسم نصين، نص مرحرح من الفضا ونص عمال يلم كل السحاب ناحيته ويتقل ويتقل م المطر، وعصفور صغير نادي لأصحابه عشان يهربه من كام نقطة مية لأحسن تمطر وريشه يتبل، و طيارة مسافرة لوحدها وهربت من النص المليان لحد ما اختفت في النص الفاضي.... توحفة السما
# كانت صدمته فيا كبيرة بس ضحك غصب عنه لما سألني: المكرونة بتزرع فين؟؟؟ ولقاني بفكر...بفكر بجد ومش عارفة...فكمل السؤال: طب بتتزرع في فصل ايه؟؟ ولما قولتله لأ مش خدناها في المدرسة، أخدنا الرز بس...... رد بسؤال تاني: هيا المكرونة بتتزرع يا دعاء؟!!
# هيا بقى كانت صدمتها فيا اكبر واكبر، لما كان عندها نبطشية في الشغل واتصلت بيا وقالتلي وكأنها بتكلفني بواجب وطني: دعاء، انا هاعتمد عليكي انهرده في الغدا.. هاقولك ازاي تعملي مكرونة.... وشرحتلي الخطوات وبعدها: يالا يا دودو ورينا شطارتك.... بعدها بخمس دقايق اتصلت بيها: ماما المكرونة مش عارفة مالها شكلها بايظة ولا ايه؟؟؟ ماما: انتي عملتي ايه بالظبط؟؟ انا: انا كنت لسا مش عملت حاجة غير اني غسلت المكرونة لقيتها ساحت!!!!!!!!!!!!! ماما: هيا المكرونة بتتغسل يا دعاء؟؟؟؟؟؟؟؟؟؟؟؟؟؟؟!!!!!!!
# ركبت الاتوبيس لقيته بيغني.. بيغني اغنيات فريد الاطرش، ومع اني مش من جماهير فريد الا اني حسيت الاغاني حلوة بغباء، صوته كان يشبهه، وصوته كان شب اوي مع انه راجل كتكوت جدا وعالمعاش، قالنا انه متعود يقدم الوصلة دي يوميا في المواصلا.. كان مغرور، بس عذرته عشان خلاني غصب عني ابتسم... واسمعه..
# اصحاب العقول في راحة، بحط مفتاح درج المكتب في الاسنسير ومفتاح الاسانسير في باب الشقة اوفـ درج المكتب...قالوا المفاتيح بتحل طلع كترها بيعقد!!!
#
دربكة: حرمًا....دعيتيلي؟
- اه طبعن
دربكة: كدابة، يعني اصلن جيه ف بالك تدعيلي؟!!
- دعيت لكل الناس وانت واحد من الناس...
دربكة: طب افرضي واحد وحش يعني تدعيله زي الواحد الكويس؟ ازاي يعني؟
- ماهو ربنا ممكن يصلح حاله لو دعيتله عشان يبقى يستاهل الدعوة..
دربكة: طب لو مابقاش كويس؟؟
- لو مابقاش كويس يبقى مايستاهلش وهياخد زي اللي بيعمله... دربكة: يعني ممكن تدعي لحد مش كويس تروح الدعوة تيجي فيا انا عشان انا كويس :)) ؟!!!
# دونًا عن كل الحصص، حصة الاملاء كانت بتخضني بجد.. كنت عارفة اني بكتب ببطء ويمكن كنت باتلخبط اكتر طول مانا خايفة مالحقش الكلام اللي بتقوله المس، مش كانت فارقة اي حصة عندي غير الحصة التاسعة، كنت بستناها بفارغ الصبر لأنها الحصة الوحيدة اللي كانت 5 دقايق تقريبا.. بتنجز يعني!!
# كنت بكتبله بخطي وكان خطي وحش، ولسا وحش جدا، مش رقيق وزغير كده! كل حرف كأنه مكتوب ف دنيا لوحده، منعكش يعني.. بس بردو كنت بحب اكتب عالورق.. مع ان ماما كانت بتسجل شريط الكاسيت وتديلي بتاع 20 ثانية اتكلم فيهم الا ان احساسي بالجواب اعمق بكتير، حتي الكلام..مش فاكرة غير انه ماكانش يشبه اسطمبة الجوابات اللي كنا بنكتبها بسذاجتنا للمدرسة اللي بنحبها!! بس بسأل نفسي مين ف الدنيا دلوقت بيقدر قيمة الجواب ان ماكنش فاتورة فيزا او بيان حساب في البنك؟!!
# كنت زعلانة اوي انهم يوم ما سألوني بتخافي من ربنا قولتلهم لأ، ف ردوا باستنكار ازاي؟!! كلنا لازم نخاف من ربنا!!كنت شايفة ان ربنا حد حلو اوي والشيطان حد وحش اوي واحنا بنخاف من الوحشين وبنحب كل حاجة حلوة، ومادام بنحبه ومش بنعمل حاجة وحشة اكيد هو كمان بيحبنا... بس لما كبرت عرفت ان اللي بيحب اوي بيخاف اوي وبيخاف مايعرفش يرضي اللي بيحبه وبيخاف من البعد عنه اكتر من خوفه من النار نفسها مهما اتحكي عنها... عشان كده حبوا ربنا...مهما راح منكو.. الحب أقوي... الحب أبقى
# كانت بتقوللي انا مارتاحتش الا اما اشتريت الكفن بتاعي، قولتلها: يعني ايه الكفن ده؟
- ده اللبس اللي بيلبسوه للميت لما ييجوا يدفنوه، انا بقى جبت كفن حلو، عشان لو مت ماحدش يتعبلي او يجيبلي كفن مايعجبنيش
- انتي ليه عايزة تموتـي؟
- ايييييه كفاية عليا كده بقى انا عشت كتير وشفت ولادي واولاد ولادي، هعوز اكتر من كده ايه!! نعمة والحمد لله على كده مش عايزة حاجة تاني
- بس انا مش عايزاكي تموتي
- الموت راحة وكل الناس هاتموت..
- كل الناس كل الناس!! يعني انا كمان هموت؟
- انتي لسا ماشوفتيش حاجة، لكن انا خدت نصيبي مالدنيا خلاص وكلنا هانموت...
- بس يا تيتة انا موش عايزة اموت.. وموش عايزاكي تموتي، ماتموتيش... ماشي؟؟
#
- حسن: انا عايز اقول حاجة كده.. Quote يمكن!
- طب قول..
- حسن (وهوَ يٌفكر) : عايز اقول.....بعض من النجاح فشل...وبعض من الفشل نجاح...
- صحيح.. صحيح جدا
- حسن: انا هاعمل شاي، اعملك معايا؟؟ Hassan Reda Hassan
# الاتنين شايلين هموم... الاتنين صابرين.. الاتنين ساكتين.. الاول من كتر ما شال بقى هش يطير ويتسحب بأقل لطشة هوا، فسموه سحاب.. والتاني من كتر العطش بقى قاسي وبشوكه ومراره بيجرح اللي يفكر يلمسه، وقالوا عنه صبار، والاتنين مستنين رحمة واحدة.. أمر واحد من ربنا... الاول عشان يفضفض ويدوب حموله، والتاني عشان يتسقي بنصيبه بهموم السحاب.. فقالوا الرحمة مطر...
# مع اني بخاف من الضلمة وبتخانق مع أختي لما تقفل النور والباب سوا بالليل، الا اني لما بصلي بطفي كل الانوار وبقفل كل البيبان....!!
# لوهلة من الوهلات لحظة من اللحظات...قررت ادور على أصولي في الصعيد... بس الحمد لله بمجرد ما شرحلي الخريطة اتصدمت وصرفت نظر عن الموضوع... Amr Ali Sayed Ali
# في حاجات كتير من بعيد بيبقى شكلها حلو ولما بنقربلها....بنتصدم!! معروفة جدااااااااااااااااااا
# جابت كوباية ميًّة وحطيتها جنبي...فسألتها: سبتيها هنا ليه؟؟ ردت وهيا بتحط شريط الدوا جنب الكوباية: هاجبلك حاجة حلوة.. فأتغظت.. ماكانتش بتضحك عليا عشان اخد الدوا، كانت بتحاول ترشي ارداتي، بس ماكانتش عارفة اني من كرهي في الدوا كرهت الحاجة الحلوة اللي باخدها بعده... :( :(
# لما بالاقي ناس بتتكلم عن الاعجاز في اي حاجة اكتشفوها وربطها بين القرآن او السنة مش بستغرب زي زمان، بس بقول سبحان الله، دي قدرته وده اللي احنا عارفين من جوانا اننا هانلقاه... سبحان الله
# أول مرة شوفته زعلت ان الكاميرا ماكنتش معايا، كان طير ابيض شبه الوزة شوية وابوا الفصاد شوية، لكن لا هو وزة ولا ابو فصاد، لونه ابيض ناصع بيعكس نور الشمس الضعيف الصبحية، واقف على صخرة صغيرة جدا في وسط المية، كملت طريقي فوق كوبري الجلاء اللي بمشيه عالنيل كل يوم وقولت اكيد هايطير دلوقت، حظ بقى............ لكن الغريب ان يجي تاني يوم واشوف نفس الطير ابو رقبة طويلة على نفس الصخرة عمال بيلف يدور حوالين نفسه يمين وشمال، مسكين محتار مش عارفة فـ ايه، يمكن مش عارف يطير لأنهي اتجاه، بس بردو ماكنش معايا الكاميرا!!
تالت يوم..... يووووه هوا انت تاني؟؟ انت متذنب هنا بقى ولا ايه،مين بيعاقبك؟ يكونش جناحه مكسور؟!!! احترت فأمره شوية وكملت طريقي عادي، من غير الكاميرا، خلص الاسبوع و انا كل يوم انسى الكاميرا، وبدأ الاسبوع اللي وراه وهو لسا بردو فـ مكانه، تاني يوم من تاني اسبوع، قبل مانزل لقيت الكاميرا على مكتبي و كنت مستعجلة، لكن بيني وبين نفسي قولت مش مهم، هو واقف هايروح فين يعني!! نزلت من البيت من غير ما اخد الكاميرا، ولما مريت بالكوبري اللي فوق النيل لقيت الصخرة زي ما هي، لكن الطير كان اختفى!!! ومع ان ماكنش معايا الكاميرا، الا اني ندمت....!!
# أول مرة شوفته زعلت ان الكاميرا ماكنتش معايا، كان طير ابيض شبه الوزة شوية وابوا الفصاد شوية، لكن لا هو وزة ولا ابو فصاد، لونه ابيض ناصع بيعكس نور الشمس الضعيف الصبحية، واقف على صخرة صغيرة جدا في وسط المية، كملت طريقي فوق كوبري الجلاء اللي بمشيه عالنيل كل يوم وقولت اكيد هايطير دلوقت، حظ بقى............ لكن الغريب ان يجي تاني يوم واشوف نفس الطير ابو رقبة طويلة على نفس الصخرة عمال بيلف يدور حوالين نفسه يمين وشمال، مسكين محتار مش عارفة فـ ايه، يمكن مش عارف يطير لأنهي اتجاه، بس بردو ماكنش معايا الكاميرا!!
تالت يوم..... يووووه هوا انت تاني؟؟ انت متذنب هنا بقى ولا ايه،مين بيعاقبك؟ يكونش جناحه مكسور؟!!! احترت فأمره شوية وكملت طريقي عادي، من غير الكاميرا، خلص الاسبوع و انا كل يوم انسى الكاميرا، وبدأ الاسبوع اللي وراه وهو لسا بردو فـ مكانه، تاني يوم من تاني اسبوع، قبل مانزل لقيت الكاميرا على مكتبي و كنت مستعجلة، لكن بيني وبين نفسي قولت مش مهم، هو واقف هايروح فين يعني!! نزلت من البيت من غير ما اخد الكاميرا، ولما مريت بالكوبري اللي فوق النيل لقيت الصخرة زي ما هي، لكن الطير كان اختفى!!! ومع ان ماكنش معايا الكاميرا، الا اني ندمت....!!
