مجلة سوا...مجلة طلابية منوعة تصدر عن طلبة كلية الصيدلة جامعة القاهرة، فيما يلي لقائي مع أقدم عامل بالكلية، ولقاء أخر مع عميد الكلية....
بسم الله الرحمن الرحيم
حوار مع أقدم محضر في كلية صيدلة
· فى الاول .. قولنا ببيانات بطاقتك الشخصية ؟
الاسم محمد احمد محمد , مواليد 67 يعنى سنى 40 سنة , متزوج و عندى بنتين "نادرة 8 سنين" و " منة 5 سنين" .
· بقالك كام سنة شغال فى الكلية؟ و اول ما اشتغلت كان عمرك اد ايه وقتها؟
بقى لى فالكلية تقريبا 25 سنة اتثبت "اتوظفت" فى 86 و كان عندى 19 سنة لان شغل الحكومة بيبدأ من السن ده لكن بدأت شغلى و انا عندى 17 سنة و ده قبل التثبيت .
· ايه هى الاقسام اللى اشتغلت فيها لحد دلوقت؟
فى الاول خالص اشتغلت فى ورشة الكلية تحت و بعديها دخلت الجيش و لما خرجت منه مسكت الاسانسير, بعد كده رحت الكيمياء الصيدلية , و اشتغلت بعد الكيمياء الصيدلية فى الادراة و بعد كده اشتغلت فى مكتب العميد عند الدكتور "عبد القادر السيد احمد" و كان هو العميد وقتها و بعدين رجعت تانى للقسم بتاعى "الكيمياء الصيدلية" .
· كم عميد مروا عليك لحد دلوقت " عاصرتهم يعنى" ؟
عاصرت تقريبا 9 دكاترة هما د.فايق هاشم د.سيد هلال د.عبد القادر السيد احمد د.احمد عبد البارى د.نادية مرسى د.محمد صلاح د.احمد عطية و د.عمر رشوان دلوقت .
· مين كان احسن عميد من وجهة نظرك؟
لأ كلهم كانوا كويسين جدا جدا و كل اللى كان بيمسك بيغير الكلية للاحسن .. بس اللى عملوا الكلية اكتر د.سيد هلال د.عبد القادر د.احمد عبد البارى د.نادية مرسى .
· طيب قولنا بقى من بتاع 30 سنة كده الكلية كان شكلها ايه؟
هو طبعا كان الشكل مختلف جدا , بس دلوقت احسن بكتير , يعنى المبانى الجديدة ماكانتش موجودة و كانت كلية الطب و المشرحة هنا ,و لحد وقت قريب حوالى 8 سنين كانت المشرحة هنا و كل ده اتشال , كان طلبة طب القصر العينى بيجو هنا و كان فى كوبرى بيوصل بين طب القصر العينى و صيدلة عشان المشرحة و الكوبرى ده اتهد .
كان فى مبنى لصيدلة اللى هو مبنى العقاقير و اللى كان فيه مكتب العميد القديم , و المبنى اللى فيه الكيمياء الصيدلية .
· و بالنسبة للمعامل نفسها اتغيرت كتير برضو؟ و كان فى امكانيات زمان؟
ايوا طبعا اتغيرت كتير للاحسن , بس الامكانيات زمان اكيد مش زى دلوقت , كل وقت و ليه امكانياته , كان زمان بيشتغلوا بحاجات متعبة لكن دلوقت كل حاجة اتطورت , ماينفعش نجيب الحاجة بتاعة زمان لدلوقت خالص .
· كلمنا عن دكاترة زمان .. احنا شوفناهم دلوقت..بس زمان كانوا ازاى؟
الدكاترة هما هما , هما نفس المجموعة , بس هو معيدين زمان بقوا دكاترة دلوقت و هكذا..
· و شخصية المعيد بتختلف كتير عما يبقى دكتور؟
يعنى على حسب كل واحد بيبقى ازاى , بس هو دايما بيختلف للاحسن , و دايما فى فرق , يعنى العميد مش زى المعيد مش زى الاستاذ .. شخصيتهم بتختلف اكيد .
· طيب و الطلبة؟؟؟؟؟؟؟؟
الطلبة دى على كل لون , هى بس المشكلة فى حاجة , ان الاول كان العامل محترم شوية , لكن دلوقت بقوا يعتبروه اقل منهم .. بس مش كل الطلبة كده , بس فى طلبة معينة بتخلى العامل ده و لا حاجة تقولك " انت حتة عامل " .
بس هو الفرق جامد جدا , زمان كان احسن عامة لكن بردو فى الحلو و فى الوحش سواء دلوقت او زمان , بس الاول كان فى احترام اكتر من كده بالنسبة لينا و بالنسبة للدكاتر اكيد بردو , يعنى اللى ماسك معمل بيبقى دلوقت عاوز يسيبوه من معاملة الطلبة , و زمان ماكنش فيه كده .
· و تفتكر ليه الطلبة بقوا كده ؟ ايه السبب يعنى؟
و الله على حسب اللى بيقولوا عليه العصر يعنى , بس طبعا ماكنش فى طلبة بتقعد فاضية فى الكلية زمان لان كان المعمل 8 ساعات و 12 ساعة زى الكيمياء الصيدلية و الطلبة كانو بيحضروا للاخر , لكن دلوقت بقى 4 ساعات لان الطلبة كتروا اوى , كان المعمل الكبير الاول بيبقى فيه 11 او 12 طالب , و كان وقتها الشغل شغل , فمكانش الطلبة بيقعودوا فالكلية زى دلوقت .
· كان فيه تجاوزات من الطلبة , يعنى طلبة بيزوغوا او مايشتغلوش؟
هو طبعا فى , بس زمان مش زى دلوقت , بالنسبة لدلوقت اكتر بكتير .
· انت شفت طلبة حديث فى المعامل و شوفت كمان طلبة قديم .. شايف مين الاحسن؟
طلبة قديم احسن طبعا , لأن كل جيل بيختلف عن الجيل اللى قبله , و انا مش بقول كل الجيل ده وحش , لأ طبعا , لأن صوابعك مش زى بعضها , و انتو كمان فى جيل هاييجى بعدكم و يبقى اسوأ اكتر , يعنى 3 حديث احسن من 2 حديث احسن من اولى حديث , مختلفين فى المعاملات و الاسلوب و الطريقة , و اى زمن فيه الحلو و فيه الوحش , بس سنة عن سنة الوحش بيزيد , و برضو مش كل الطلبة .. لكن فى طلبة معينين بيخلو شكل الصيادلة مش اللى هو يعنى .
· طيب و فى الدراسة و المنهج مين احسن ..نظام حديث و لا قديم ؟
برضو القديم احسن , طلبة حديث جايين مش فاهمين حاجة و كل واحد فاكر انه خلص خلاص و بقى دكتور , و اكيد مش كلهم يعنى , و دفعة حديث فيها كتير السنة دى بوظوا الشغل و كانت عينيهم هاتضييع .
· يعنى السنة بتاعة علوم هى اللى كانت عاملة إختلاف شوية؟
السنة هى السنة , بس الفرق ده من الطالب نفسوه مش من علوم , و كل دفعة حتى فى قديم فيهم كده و فيهم كده و هم عارفين اكيد كان بردو بيتقال ان الدفعة اللى قبلهم كان احسن , يعنى احنا بنخاف عليكم اولا .. بنتكلم عشان مصلحتكم ..
لكن لما اجى اكلم واحد لسا فى سنة اولى يقولى "ايه يا عم" , انت هاتعلمنا؟؟؟؟؟!!!!!!!!!
يعنى انا بقالى 25 سنة فالكلية , راجل ماعيش شهادة بس الخبرة بتعمل فرق , يعنى لما اقولكم البسوا النضارة او اقفلوا البالطو انا مش بعمل عليكم ريس , انا بس خايف على عينيكم و لبسكم , و فيه اللى بيتقبل الكلام و فيه اللى يقولك "ايه يا عم" !!
· قولنا بقى الاحداث و التغييرات اللى مرت عليك فالكلية؟
التغييرات كتيرة جدا .. يعنى المبانى الجديدة و المعامل الجديدة كويسة جدا و مصلحة للطالب , و التعليم كمان اتطور كتير , و بردو الأسر دى كانت موجودة و الانتخابات و نفس المنافسة , و المهم هما بيعملوا ايه كويس للطالب , لكن اهلل و اعمل مظاهرات و حاجات ماتعملش فرق يبقى دى ماتنفعش.. مالهاش لازمة .
· تفتكر مع دكتور عمر رشوان ايه التغيير اللى هايحصل فى الكلية؟
الصراحة دكتور عمر رشوان انسان ذوق و اخلاق جدا جدا , و اكيد هايطور فى الكلية , لان كل عميد بييجى بيطور فعلا..
و هو دلوقت بيجدد المعامل للطلبة , و انا باتوقع الاحسن كمان ..
· كان نفسك فى ايه تعملوا او يتغير فالكلية و ماتعملش ؟ ايه هى مشاكلكم؟
انا كان نفسى بس اسلوب الطلبة مع العمال يتحسن شوية , لكن بالنسبة للشغل دى مشكلة مش هاتقدروا تحلوها , احنا بس اللى عاوزينه انهم يهتموا بالعمال لا اكتر ولا اقل ; العامل النهاردة لما بيقعد من 8 الصبح ل8 بالليل ده ارهاق ليه.. بس الطالب بيقعد 4 ساعات فى المعمل مش زى العامل قاعد طول اليوم مايقدرش يتحرك , و ساعات ممكن ييجى 6 الصبح او يقعد ل 9 او 10 عشان ينضف و يوضب المعمل فبيبقى ارهاق , يعنى لو يزيد عدد العمال و تتقسم ساعات الشغل يبقى احسن .
و بالنسبة للمشاكل المادية احنا بس عاوزين الاضافى يزيد شوية و دى حاجة بنتكلم فيها من زمان , الحاجة غليت و احنا لسا الضافى بتاعنا 17.5 ... طبعا بتلاقى الكل يقول " انتو الطلبة بتديكم .. بتهبشوا من الطلبة.. انت قاعد فى المعمل بمصلحتك.. " يعنى انا نفسى افهم الطالب هايدينا ايه ,و بعدين الطالب ده انا بعتبروه ابن ليا ..هارضى ابنى يتهبش منه؟!! و مين هايقبل على نفسه انه يجيى للطالب و يقوله هات , و لو فى عمال بيعملوا كده انا ماقبلهاش, و دى فى الاخر بتبقى حاجة انت و ذوقك , ماحدش هايضربك على ايدك عشان تديله .. و الطالب فى الاول و الاخر بياخد فلوس من اهله .. و لو انت النهاردة اديتله بكرة مش هاتديله , يعنى انتوا بتطلعوا ساعة الامتحان االلى فيه النصيب للعامل الشاقيان معاكم ..ماشى , بس مش معقول هاتديله كل يوم لأنه مش فرض عليك .. و احنا اللى طالبينه ان الاضافى يزيد بس ..
لكن طبعا انا راضى بالمقسوم , دى اهم حاجة , بس لو فى عامل او اتنين بيخلوا الصورة وحشة مش معنى كده نسوء صورة كل العمال!!
طيب ما عشان الصورة دى ماتبقاش وحشة تيجوا انتو تقعودوا معانا و تشوفوا ايه المشكلة عشان مايبقاش فيه الصورة الوحشة دى , يعنى اجتمع مع العمال.. ماخدش بكلام محمد و لا احمد بس , لأ يبقى اجتماع مع العمال كلهم عشان نشيل الصورة دى اللى احنا مش عاوزينها , و نشوف المشاكل بجد ..
· احنا بنسمع طلبة كتير بتقول احنا اصحاب عم حمادة.. بيفضل بقى الكلام ده بعد كلية ؟؟؟
الحمد لله طبعا , فى ناس متخرجة بتيجى تسلم عليا , و الحمد لله الواحد اسلوبوه حلو مع الناس .. لكن لو انا اسلوبى وحش مش هاتعرفونى اصلا .. و ربنا يوفقكم..
· طب ادى للطلبة روشتة نجاح .. او نصيحة فى المعمل ؟
اولا لازم تاخدوا بالكم من الشغل شوية لان فى مواد كاوية , و اللى بطلبوه من اى طالب حديث اوقديم النضارة و البالطو لأن دول اهم حاجة و ده لمصلحتكم ..
· فى الاخر بقى اديلنا كلمة للمجلة؟
انا بس اتمنى ان العدد الجاى ده يبقى حاجة مهمة للطلبة , يعنى ياخدوا منها و يستفادوا منها صح .. و ربنا معاكم ......
منى فتحى عبد الستار.....رابعة قديم
دعاء صلاح الدين ........تانية حديث
صور.......................محمد شعبان
ديسمبر 2006
إسلام وصفى الوكيل
دعاء صلاح الدين
2006
ديسمبر 2006
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بسم الله الرحمن الرحيم
حوار مع د.أحمد عطية سعدة
عميد كلية الصيدلة السابق
جامعة القاهرة
•بداية حدثنا عن طفولة احمد عطية سعدة و عن المدرسة ؟
عشت فى قرية "هربط" محافظة الشرقية مركز ابو كبير و درست بها 4 سنوات "الابتدائية" ثم انتقلت الى المدرسة الاعدادية فى المركز و بقيت هناك 3 سنوات لاحصل على الشهادة الاعدادية عام 1956 و بالفعل دخلت المدرسة الثانوية فى نفس المركز و اخذت الثانوية العامة فى عام 1963 و كانت نسبة مجموعى حوالى 69% ,و قبلت بجامعة الاسكندرية و كانت نسبة مجموع الاول على الجمهورية فى ذلك الوقت 80% , اردت فى البداية الالتحاق بكلية الهندسة جامعة القاهرة ثم عدلت عن ذلك الى الصيدلة و كانت كلية الطب خارج مخططاتى فى حين كان لمجموعى القبول فى كلية طب عين شمس .
و كان ترتيب المجاميع فى ذلك الوقت هو الهندسة و بعدها الصيدلة ثم كلية الطب .
تخرجت بعد ذلك من صيدلة الاسكندرية عام 1968 بتقديرعام جيد جدا مع مرتبة الشرف و تم نعيينى معيدا بجامعة القاهرة عام 1969 –عن اعلان تقدمت له- و كان التعيين يتم عن طريق اعلانات بالجرائد .
•من الذى ساهم فى تكوين شخصيتك؟ من هو مثلك الاعلى ؟
ساهم فى شخصيتى والدى و والدتى و كان لى مثلا اعلى فى خالى ايضا و لكن كان لوالدى النصيب الاعظم فى ذلك,فهو مثلى الاعلى فى القيم و الاخلاقيات ,اما بالنسبة للعلم فكان مثلى الاعلى فى ذلك عميد كلية الصيدلة بجامعة الاسكندرية و هو استاذى فكان على خلق و علم .
•ما هو انطباعك عن الدراسة بالكلية ؟ هل كانت مشوقة أم لا ؟
فى الحقيقة عندما كنت طالبا كان التعليم جيدا و الامكانيات متوفرة , اما الان فبالطبع اصبح هناك سهولة اكبر فى التعليم و الامكانيات متوفرة بشكل اكبر ,فلم يكن لدينا "كتاب جامعى" فكان كل شىء ينقل بخط اليد ,كنا نبحث فى المراجع و نقرأ فى المكتبة و لم يكن يوجد للكتاب سوى نسخة او اثنين , و كان التعليم وقت ذاك "تعليم" حيث يعطى الاستاذ جهد غير عادى و فى نفس الوقت المعامل متاحة طوال الوقت للطلاب لاجراء التجارب فى اى وقت .
اما هذه الايام فنجد الامكانيات افضل و الوسائل اسهل و انما تكمن المشكلة فى العدد فاصبح كل شىء فى المجتمع "take away" فالطالب يستسهل مع توافر وسائل اسرع مثل الكومبيوتر و الانترنت , فاصبح باستطاعته انجاز كل شىء فى اسرع وقت ممكن و الشىء الاخر هو الخوف من نتائج الامتحانات و كيفية تصحيح كل هذا العدد الكبير .
فعندما كانت الاعداد اقل كان التعليم اجود الى حد ما ,و لكن من يريد العلم الان يجد تعليما على اعلى مستوى ; فالتلعيم الان يصاحبه امكانيات غير عادية لم نستطع ان نمتلكها فى ذاك الوقت .
•لقد درست فى الكلية بالنظام القديم بالطبع ,أما الان اصبح النظام الحديث هو السائد; هب انت من مؤيدى النظام القديم أم الحديث ؟
النظام الحديث هو الافضل بالطبع , و انا من مؤيديه ; فكل لائحة بالجامعة يجب ان تغير كل عشر او خمسة عشر سنة, لأن العالم يجرى و لابد من مواكبته .
•كيف طبق النظام الحديث بصيدلة القاهرة لأول مرة ,علما بأن النظام القديم معظم كليات الصيدلة فى مصر مازالت تتبع النظام القديم ؟
فى الحقيقة بدأنا محاولاتنا فى تطبيق النظام الحديث منذ فترة طويلة جدا ; حوالى عام 1992 و لم نستطع ذلك حيث كان يحتاج لمجهود كبير لاقناع الاساتذة به , و تم بحمد الله تطبيقه عام 2003 ليصبح النظام المتبع بصيدلة القاهرة .
•لماذا اخترت قسم العقاقير بالتحديد للتخصص فيه ؟
اعترف بصراحة ان هذا ايضا لم يكن من الاشياء التى كانت من اختيارى ,و لكنى احببته بعد ذلك ; فقد كنت من مجموعة المعيدين الذين عينوا مرتبة شرف و كان العميد فى ذلك الوقت عقاقير و لذلك كان يختار الاوائل لتعيينهم بقسم العقاقير , فربما كنت افضل اقساما اخرى و لكنى احببت العقاقير بعد الدراسة فيها .
•حدثنا عن تدرجك الوظيفى حتى وصلت لمنصب عميد الكلية ؟
لقد عينت معيدا ثم حصلت على الماجيستر عام 1974 و عينت مدرس مساعد عام ثم سافرت الى امريكا منحة شخصية و قضيت هناك اربع سنوات " إلا شهر" حصلت فيها على الدكتوراة , ثم عدت و عينت مدرس هنا عام 1978 ثم استاذ مساعد عام 1984 فاستاذا عام 1990 , و شغلت منصب وكيل الكلية فى اول عام 1993 " و كنت اصغر و كيل كلية فى ذلك الوقت" .
بعد ذلك تركت الكلية و عينت عميدا لاول كلية صيدلة خاصة فى مصر عام 1996 "جامعة 6 اكتوبر" بعد ذلك بعامين عينت نائبا لرئيس جامعة 6اكتوبر و فى عام 2000 اصبحت رئيسا لجامعة 6 اكتوبر " لاربع سنوات" و كنت من اوائل الصيادلة الذين شغلوا رئيسا لجامعة على مستوى مصر كلها .
ثم رجعت عميدا لكلية الصيدلة جامعة القاهرة فى اغسطس عام 2003 .
•كيف تم رجوعك للكلية بعد تركك لها و شغل منصب رئيس جامعة 6 اكتوبر ؟
"دى سياسة بقى" ........... بعد وفاة العميد السابق –رحمه الله- و كان صديقا لى بشكل غير عادى ,عرض على الامر من جانب وزير التعليم و رئيس الجامعة و وافقت على الفور لخدمة كليتى .
•هل كان طموحك ان تصبح يوما ما عميدا للكلية؟ و هل كان ذلك حينما كنت طالبا ام اثناء تدرجك الوظيفى ؟
بصراحة نعم.. و لكنه لم يكن طموحى حينما كنت طالبا.. و لكن اثناء تدرجى الوظيفى كان يراودنى هذا الحلم "بالانتخاب" لأنه كانت لى شعبية كبيرة فى الكلية و كان لى نشاطا اجتماعى و ثقافى و سياسى و علمى , و لذلك كانت الفكرة واردة لدى , و عندما كنت وكيلا للكلية كان الجميع يقولون ان هذا هو العميد القادم و لكنى تركتها للعمل بجامعة خاصة و الصدفة وحدها أرجعتنى اليها.
•كم عاما حتى الان توليت منصب العميد؟ و مذا قدمت للكلية اثناء ذلك ؟
توليت عميدا للكلية لثلاث سنوات .. و فى الحقيقة إن كل واحد منا يضع لبنة يكمل بها بناء من سبقوه, و قد كنت من انصار التحرك الايجابى الى حد ما..فكانت الكلية فى حالة جيدة و لكن حالة المبانى فى الشكل العام لم يكن مريح , و حاولنا بالجهود الذاتية ان نعيد رونق الكلية إلى رونق جديد و نحاول بقدر الامكان بالرغم من المساحة الضيقة ان نزرع اشجارا كثيرة نوفر بها عنصر الخضرة للطلاب .
كما انشأنا معملى كومبيوتر فى كل منهم 40 جهاز بالنظام الحديث , و الشىء الاخر هو انشاء وحدة زراعة الانسجة ; و هذه تعتبر اول وحدة زراعة انسجة نباتية على مستوى مصر باكملها و كلفت حوالى 14 مليون جنيه , و غيرذلك اننا اضفنا مصاريف تدريب عالية الى حد ما لجدية الدراسات العليا , و ذلك لنحد ممن يريدون عمل دراسات عليا ب "الهزار" بدون جدية فيها او مصداقية , و رغم ذلك كان الاقبال شديد جدا .
كما تم انشاء مصنع تجريبى كلف حوالى مليون و 200 الف جنيه , و نادى اعضاء التدريس , و حدة لتدريب و تنمية قدرات اعضاء هيئة التدريس بالاساليب العلمية الحديثة , و ذلك على مستوى الجامعة كلها و ليس لكلية الصيدلة وحدها .
و تم عمل توسيعات كبيرة بالمسجد ايضا , و فى الحقيقة كانت بمجهود تبرعى معظمه من الطلاب و من الجامعة .
•هل هناك كتب او مؤلفات أضفتها حتى الان ؟
بالطبع انا مشارك فى وضع كتاب ال phyto الذى يدرس لدفعتى الثالثة "قديم" و الثالثة "حديث" , و هناك ايضا كتب شاركت فيها عن النباتات السامة فى مصر, و فى الحقيقة ان العمل الاكاديمى قد اخذنى من البحث العلمى قليلا , و لكنى أشرف حتى الان على مجموعة ابحاث جديدة فى زراعة الانسجة , لأن هذا هو المستقبل ; ال "biotechnology" و زراعة الانسجة , و هذه هى احدث الاشياء فى مجال العقاقير , كما انى احب التدريس و لذلك ادرسها ايضا .
•ما رأيك فى أسلوب التدريس فى الكلية حاليا ؟
نحاول الى حد ما ان نواكب العصر, و لذلك اضفنا هذا العام لكل قسم وسائل ال data show و وفرنا lap tops لكى تتوافر المحاضرات بهذا الاسلوب , و اضفنا المزيد من هذه الوسائل بمكتب الوكيل و العميد حتى يتوافر المزيد لمن يحتاج .
نحاول ايضا ان نخلق تعليما الكترونيا السنوات القادمة باذن الله, و ذلك بوضع المناهج كاملة على الموقع الالكترونى للكليةو يصبح الطالب "inter act" فيتعلم منه و يسأل استاذه ايضا .
•و ماذا عن الانشطة الطلابية فى الكلية ؟
و فى الواقع كان للكلية هذا العام نشاطا متميزا ايضا و العام الماضى عن طيق تنظيم ملتقيات توظيفية لمساعدة خريجينا على ايجاد فرصة عمل.. و اعتقد ان هذه الكلية الوحيدة التى نظمتها بهذا الشكل على مستوى كليات صيدلة .
كما اننا اقمنا دورات تدريبية على الصيدلة الاكلينيكية و احضرنا استاذا من امريكا العام الماضى .
و اقيمت دورتين صيدليتين ; و هى عبارة عن تجمع لكل كليات صيدلة و كانت الدورة تجمع حوالى 1000 طالب من كليات الصيدلة فى مصر ,كلها تجاه صيدلة القاهرة , و هذا يحسب لكلية الصيدلة جامعة القاهرة رغم ان المتشددين عارضوها لمصاريفها .
فالطالب الذى لا يشارك فى نشاط لا يكون طالب فى جامعة , بل انه طالب مدرسة, و نحن نريد خلق منه من يستطيع ان يتحمل المسئولية بعد ذلك .. فالانسان الخامل لا يعتمد عليه .
•هل كان لك نشاطا فى الكلية ؟
بالطبع كان لى نشاطا فى الكلية , و كنت اذاكر ايضا ; فالاولوية دائما للمذاكرة , و لكن هناك وقت طويل جدا من الفراغ , فيجب ان اشارك فى نشاط الكلية , و لذلك كان لى دائما طموح ..و الا لن ابنى شخصية انسان بهذا الاسلوب .
•حدثنا عن الاسر الموجودة فى الكلية ؟ كيف ترى مميزاتها و عيوبها ؟
من المفترض طبعا ان تعمل الاسرة على التآلف بين الطلاب و بعضهم البعض , و تنطم مشاريع لخدمة الطالب و إظهاره فى صورة جيدة , و ان يكون التنافس بينهم شريف و بناء لخدمة الكلية و الطلاب , و هذه هى المميزات , و بالطبع معظمهم ينفذ هذا و إن كان هناك بعض التجاوزات من بعض الاسر .
أما عن العيوب فان كل منهم يريد ان يتصور ان اسرته هى الكمال كله , فنحن نتنافس لنصل لهدف معين , قد يصل بعضنا فيجب ان نساعده , و لكن لا يجب ان يكون التنافس غير شريف .
و انشطة الكلية تقدمها الاسر من خلال الكلية مرورا برعاية الشباب .
•هل الصيدلى الخريج من الكلية الان مهيأ بالقدر الكافى لمزاولة المهنة ؟
إلى حد ما , لا يمكن ان نقول انه جيد يحاتج الى التدريب , و لكن هناك فكرة ان نضييف بعض اللوائح التى تنص على اضافة 6 اشهر دورة تدريبية مكثفة " الطالب فى العمل" .
•هل هناك كليات نفذت فكرة كهذه ؟
بالطبع , لقد نفذتها طب اسنان بالفعل , و هى تتمثل فى الامتياز بالنسبة لكلية الطب .
•ما رأيك فى وضع الصيدلى الان بمصر ؟
يمكننى ان اقول بالامانة و من دون تفاخر ان مستوى الخريج هنا لا يقل عن مستوى الخريج العالمى إن كان لا يزيد .
•و ماذا عن مستقبل الدواء فى مصر ؟
بالنسبة لحالة الدواء فى مصر فهى بخير و تغطى فوق 90% من احتياجاتنا , و لكن مشكلتنا الاساسية هى الخامات الدوائية لأنها مكلفة الى حد ما , لكننا بالنسبة لتصنييع الاشكال الصيدلية من الدول المتقدمة عالميا .
•كيف يمكن تصنيفنا على المستوى العالمى ؟
لا يمكننا التصنيف على مستوى العالم و ذلك لاننا فى منطقتنا العربية و الافريقية رقم 1 , اما بالنسبة للعالم فقد اصبح تكتلات , اى انه لا يمكننا ان نقول دولة و لكننا نقول شركة , الشركة الامريكية بها جزء من اوروبا و جزء من اليابان , و اصبحت العملية عملية multinational company .
فنحن نصارع كما اننا بالفعل على مستوى متقدم تكنولوجيا , لكن الخامات الدوائية لازالت هى المشكلة .
•ماهى مقترحاتك للنهوض بالدواء فى مصر بصورة خاصة و الصيدلة ككل بصورة عامة ؟
بالنسبة للدواء فى مصر فهناك العديد من الشركات فى مصر يصل عدد الى نحو 70 شركة , يحاول كل منها تطوير نفسه , لكن بالنسبة للخامات فمازلنا نجرى وراء الاجنبى .
أما عن الصيدلة ككل فاعتقد انه يجب ان تتوافر خامات دوائية جيدة لتكون الصناعة الدوائية جيدة و حتى لا يكون هناك احتكارا, و ايضا يجب ان تكون صناعة البتروكيماويات متقدمة , فنحن نمتلك الكيماويات بالفعل فيجب تصنييع البتروكيماويات , و هذا شىء سهل بالنسبة لاننا دولة منتجة للبترول و بدلا من تصدير البترول خام من الافضل ان نصدره على هيئة بتروكيماويات .
•ما مدى التعامل بين الكلية و الجهات العلمية الخرى داخل مصر و خارجها ؟
بالطبع لنا اتفاقيات مع دول كثيرة و لكن اتفاقياتنا كمستشارين فى معظم شركات الادوية و كل الاجهزة الرقابية فى مصر , فلنا بصمة غير عادية , نحن اكبر كلية صيدلة فى العالم و لدينا 8000 طالب , و لا توجد كلية فى العالم بهذا العدد , كما ان لدينا اكبر عدد ستاف غير موجود فى اى مكان .
•ما رأيك فى موضوع التوسع فى استخدام الاعشاب الطبية بدلا من العلاج بالادوية الكيميائية ؟
هذا وارد جدا , و لكن الاعشاب مشكلتها انه يجب ان تكون مقننة و آمنة , كما انه لا يمكن علاج كل شىء بالاعشاب..و لكن التوسع فى استخدامها وارد..
•هل تعتقد انه يمكن ان يتحول العلاج عامة الى علاج جينى ؟ و هل انت من انصاره ؟
بالطبع انا من انصاره , العلاج الجينى هو علاج المستقبـل , و مازال العالم كله يخطو خطوات بسيطة فيه , لكن فى تصورى ان علاج العيوب الجينية المسببة للامراض هو هدف العالم كله , و لكننا مازلنا نحبو كما يحبو العالم كله , فهذا تصور للعلاج فى المستقبل و ملامحه لم تظهر بعد .
•كان لمرض انفلونزا الطيور اثر كبير على مختلف الناس و سلوكياتهم ..حدثنا عن هذه المشكلة ؟ و هل يجوز لنا ان نعتبره وباء العصر ؟
هذه المشكلة عالمية و نحن من الدول التى عالجتها بحكمة , و لكننا كنا متأخرين فى بعض الحالات , فكنا على علم بان الازمة قادمة , و كان يجب تهيئة مجازر آلية فى كل مكان بدلا من التصرف العشوائى الذى تم , مما ادى الى ارتفاع اثمان الدواجن الان بشكل غير عادى, و كان يجب ان نهيىء لهذه الصناعة كل مقاومات الحماية , فالمشكلة ستظل قائمة لسنوات و نحن نخطو على الطريق الصحيح و لكنه كان من الممكن ان نكون احسن من ذلك بكثير .
و لا يمكن ابدا نسميه "وباء العصر" , لانه كان موجود منذ زمن و تأتى موجاته و تختفى و لا توجد مشكلة فى ذلك , و لكن كان يجب ان نأخذ احتياطاتنا منذ ظهور المرض عام 2002 فى جنوب شرق اسيا , خاصة مع وجود العشوائيات فى تربية و رعاية الدواجن , و هذه هى القضية التى كان يجب ان ترعاها الدولة و ان نحسب لذلك من البداية .
•هل انت راضى عن مسيرتك العلمية و العملية حتى الان؟
احمد الله , راض جدا و قد اعطانى الله كثيرا لذلك اشكره على نعمته على , و الحمد لله لقد حققت الكثير و لا احلم باكثر من ذلك .
•ما رأيك فى من سبقوك فى تولى منصب عميد الكلية ؟
كانوا اساتذتى و قاموا باعمال فاضلة و جيدة , و اثروا الكلية ثراء ممتازا , و اشكرهم على انهم وضعوا لبنات اساسية فى الكلية , فنحن نكمل على هذه المجهودات .
•حدثنا عن حياتك الشخصية ..عن الاسرة ؟
زوجتى مدرسة بكلية الصيدلة جامعة حلوان قسم الكيمياء الحيوية , و لى ابنتان ; الكبرى تخرجت العام الماضى من صيدلة القاهرة بتقدير عام امتياز , و عينت معيدة فى احدى الجامعات الخاصة , و ابنتى الثانية طالبة فى الجامعة الامريكية .
•كي تقضى اوقات فراغك ؟
"مافيش اوقات فراغ الحقيقة" ...فى الحقيقة انا مرتبط باعمال كثيرة جدا فى صناعة الدواء و فى الرقابة على الدواء فى وزارة الصحة , و عضو فى اكثر من لجنة , و ان كان هناك وقت فراغ اما ان اقضيه مع الاسرة او اقضيه فى التجهيز لمؤتمر او ندوة او جلسة , و للأسف مساحة الوقت عندى مشغولة الى حد ما..
و لكنى احب سماع الموسيقى "التى لا تعجبكم" ; موسيقى الزمن الجميل ,ام كلثوم و عبد الوهاب و نجاة , كما انى اشاهد التلفزيون و لكنى لم اذهب للسينما منذ زمن طويل .
و احب السياسة و التاريخ بشكل غير عادى , و دارس التاريخ المصرى كله لان من يدرس التاريخ يغرس من الانتماء و الولاء للوطن و يعرف على اى جذور يقف .
•ما هى فلسفتك فى الحياة ؟
القناعة القناعة القناعة "ارضى بما قسم الله تكن اغنى الناس "
•ماهو الحلم الذى لم تحققه حتى الان سواء فى الحياة الشخصية او العملية ؟
اتمنى ان ارى مصر بالمكان التى تستحقها لان مصر يمكن ان تحقق احسن مما هى فيها الان بكثير بما تمتلكه من مقومات دولة عظمى , و ارجو ان نراها قريبا فى ذلك , احلم بان نعيش فى مجتمع ديموقراطى ,,اكثر ديموقراطية من ذلك, احلم بأن يكون كل شىء بالانتخاب , و رئيس الجامعة بالانتخاب ..بأى شكل ..انتخاب اعضاء التدريس و ممثلين الطلاب معهم..
و بالنسبة لحياتى العملية فاحمد الله لقد حققت الكثير و لا احلم باكثر من ذلك ..و كل شىء جاء الى لم اسع اليه .
•بما تنصح الشباب و خاصة ابناء كلية الصيدلة ؟
انصح الشباب بعدم التعجل ,فكل شىء آت ; فقد كنت خريج صيدلى عادى و عملت بمصنع للدواء و اصبحت معيد ثم عميد و قلبت الحروف فقط .. و سوف يأتى من هو افضل منى و يحنل الراية و اهم شىء هو ان يكون مثقف و متعلم..
و هنا رفع دكتور احمد كتابا من فوق مكتبه عنوانه " أسرار ثورة 23 يوليو" تأليف "جمال حماد" و قال الدكتور:
جمال حماد هو احد الضباط الاحرار الذين قاموا بثورة 23 يوليو و قد قابلنى مصادفة و اهدانى الكتاب..
القراءة بالنسبة لى شىء فى غاية الاهمية , فالقراءة اطلاع و انا احب ان يكون الطالب مطلع على امور وطنه و كليته و يكون انتماؤه للكلية عالى جدا , و ان يحب كليته.. قاليوم الذى لا آتى فيه الى الكلية اكون فعلا حزين..
و اختتم الدكتور احمد عطية الحديث راجيا ان يهدى هذا الحديث للشباب طريقا للنجاح بإذن الله ..
إسلام وصفى الوكيل
دعاء صلاح الدين
2006
