الخميس، 26 مايو 2011
الجمعة، 20 مايو 2011
دوششششش!!
كان ياما كان... كان في مرة واحد زعلان... ماشي في الشارع.. باصص في الارض.. عنيه دمعت..السما ندعت و بكيوا سوا..عيونه و السما، والمطر بقى سيل و الصوت بقى وششش... كل ما الدموع قصدي المطر يخبط في الارض، اول ما دخل البيت.. مسك سماعة التليفون و اتصل بيها، زعقت فيه و قفلت في وشه الخط، بص عالسماعة راح رامي التليفون في الارض واتكسر ميت حتة..هوا والتليفون، خد بعضه ونزل... والمطر لسا بيسيل، ركب فـ سماعة التليفون مسدس رش، و رن جرس الباب واول ما فتحت قالها و هوا بيرش عليها المية: "بس بقى بس......انتي (دوش)ة (دوش)ة (دوش)ة.......روحي وانت طالق من قبل ما اتجوزك، اجبلك ستارة مطلية بمية الدهب منين انا... دوش دوش دوش"، ودي كانت قصة اختراع الدوش واول استخدام تاريخي قبل ما يتطور و يتعمل منه دوش استحمام و دوش شطرنج...!!
الأحد، 15 مايو 2011
ولا بأهتم
عندي حالة نفسية
وعصبية وعندية
لما تجيلي بأستغنى
و لما تروح انا بأندم
وبسأل نفسي ليه بأهتم
لا انا عارفاك
ولا مقابلاك
ولا مقابلاك
لا انا حبيبتك
ولا بـــهواك
ولا بـــهواك
كلامنا حروفه معدودة
ومحدودة ومكبوتة
وكل ماقول هانتكلم
القاني ضايعة فـ الكتمان
وتسألني وتلقاني
بحكي بقولك أي كلام
ولا أهتــــم
وتروح وانت مش مهتم
ويجي الصبح وتقولي
صباح النور على البنور
يسعد صباحك المسحور
وتفوت وتمشي وأستنى
ولا تهتم بالمعنى
بحكي بقولك أي كلام
ولا أهتــــم
وتروح وانت مش مهتم
ويجي الصبح وتقولي
صباح النور على البنور
يسعد صباحك المسحور
وتفوت وتمشي وأستنى
ولا تهتم بالمعنى
ماعرفش ايه بيحصلي
يمكن عندي أمل أعمى
وتفضل تيجي على بالي
واعيد وازيد فـ موالي
واعيد وازيد فـ موالي
أكش واخبي على حالي
عشان ماسألش ليه بأهتم
وليه أهتم؟!!
خلاص مش فارقة
انا بدعي يا ريت أبكّم
خلاص قررت بحلفلك
لا هاتكلم ولا هأهتم
السبت، 14 مايو 2011
أي حاجة
جوايا كلام كتير تايه
يمكن عايز يتقال
حروف ضايعه وسطور
وفـ كل حرف سؤال
عارف انت لما
تكون محتار
فـ هموم بعلو جبال
شايل تلال اسرار
والسر مش متقال
والسر مش متقال
قوللي يا ليل
يا مليل
ده ضلي ولا خيال
يخايلني فين مابروح
ويروح بطبع الحال
يخايلني فين مابروح
ويروح بطبع الحال
غرقان فـ ليل القمر
ويامين يمد حبال
انا اللي قلبي كتب
فالصبر ميت موال
جوايا كلام كتير
حالف مايطلعشي
مش كاتب العنوان
والاسم ماعرفشي
ملامحه في خيالي
وفي حيرتي ماسمعشي
و ففكرتي عالبال
ازرع وماحصدشي
واهي دنيا الاشغال
احمالها مليانا
بين القلوب رحال
وهمومها عميانا
يا دنيا الادغال
يا غابة غالبانا
ليه الوهم بيجينا
و احلامنا تنسانا
و احلامنا تنسانا
الجمعة، 13 مايو 2011
على هامش الاحلام
ولقيتني من همي
بحلم وانا صاحي
وعينيا مفتوحة
وفوحدتي جراحي
اسمي انس وفحلمي
بحلم اكون انسـ..ان
بكتب في همس الليل
سطوري للايام
على هامش الاحلام
كتبتلك اسمي
وفي اخر الاحزان
كتبت عنواني
كتب القلم أحكام
في حروفها تلقاني
يمكن يكون ندمان
على وقت غربنا
يمكن يكون مهموم
و بهمه قربنا
ايوا انا مجروح
وبجرحي بكتبلك
اسم الراسل انس
وكمان انس اسمك
اصل احنا كنا اتنين
وفجمعهم واحد
انسـ...ان ومتفرق
و فـ نفــسه بيعاند
الاشتراك في:
الرسائل (Atom)