الأربعاء، 29 فبراير 2012

شريف و تامر....الحب مش كده


فاكر اول حب فحياتك؟؟ ليه حكمت على اول حب فحياتك انه الحب؟؟ مش يمكن كان احساس بإعجاب قوي؟ أو يمكن كنت متأثر بالفيلم اللي مش الرومانسي اللي شوفته امبارح بالليل وأول ما البطل جه يبوس البطلة -عشان البوسة لابد منها فكل فيلم- راحت أمك تقولك غمض عينك يا ولد...عيب، ماتشوفش الحاجات دي..... واللي طبعا خلانا فترة طويلة من عمرنا -لو انتوا زيي- نفتكر اننا جينا عن طريق بوسة باسها بابا لـماما بعد كتب الكتاب!!!
فـ الحقيقة انا زيكم كده جالي وقت حاولت افتكر فيه أول حب فـ حياتي، بس للأسف ما قدرتش أحدد انا حبيت كام مرة أصلا، وايه هو السن اللي ينفع اقول فيه اني ممكن احس بمشاعر قوية زي الحب، وده مش من كتر تجاربي، بالعكس، يمكن من جهلي بجقيقة الحب لوقت طويل جداااااااا..... وعشان كده قررت اعترف ان أول حب ف حياتي كان لعبة...
أول حب فـ حياتي كان ولد "سوفيف" اسمه حاتم.. ابن الجيران، وشريف وتامر -أولاد خالة حاتم التوأم- وابن خالتي أحمد وأخوه شريف وساعات ابن خالتي التاني عمرو، أه والله بجد كنت بحب كل دول فـ نفس الوقت ونفس اللحظة، بس بصراحة الصراحة كان عندي اسباب اني أحب كل الناس دي؛ حاتم كان جاري، بشوفه فـ البلكونة كتير، في نفس سني ونفس السنة الدراسية ده بالأضافة انه كان بياخد معايا دروس فـ خامسة ابتدائي -وده اللي كان بيميزه عن بقية الناس اللي قولت اساميهم فوق- وطبعا كنا بنلعب فـ الشارع.....!!  شريف وتامر، أولاد خالة حاتم اكبر مننا يمكن بسنة او اكتر ، شبه بعض جدا، عيونهم خضر و"أمامير"....بيزوروا حاتم مرة كل اسبوع تقريبا وكانت يوم الجمعة، وأهم حاجة اننا كنا بنلعب فـ الشارع بردو!! أكتر حاجة بتميز حبي لـ"حاتم وشريف وتامر" انه كان حب مشترك، ووقت ما اتعرفنا على بنت اكبر مننا فـ المنطقة، اقنعتني ان الواحد المفروض يحب واحد بس فـ لازم اختار واحد بس ومابقاش انانية مع ان صدقوني انا كنت ساعتها مش بقول بحبك لـ ولا واحد فيهم أصلا، انا قولت بقى اختار حاتم واركز معاه، وطبعا وقت ما اجي اكتب بـ   I love you لحاتم ف كارت كنت بكتب لشريف وحشتني فـ كارت تاني، ولتامر I miss you فكارت تالت.... مع ان وحشتني و I miss you نفس المعنى بس التنوع مطلوب!! كل ده عشان مش ينفع اقول بحبك ليهم هما التلاتة.... ده بقى كان التخريف...
شريف ابن خالتي -ده اصغر مني بسنة- وبصراحة حبي ليه كان زي حبي لفاطمة صاحبتي، حب الصديق الوفي اللي بيحب يلعب مع صديقه ومايبدلوش بصديق تاني حتى لو الصديق التاني فيه مميزات اكتر أو عنده لعب أحلى، أما احمد -أخوه الكبير- فـ كنت بحب انه اكبر مني بفرق سن جميل - حوالي اربع سنين، احمد كان بيسمع نفس الأغاني اللي بحبها، او بمعنى أصح كان هوا اللي بيسمعني أغااني مختلفة فيعجبني النوع ده من التغيير، بيحب نفس الخروجات ونفس الاستايلات من الناس، كان هوا شباكي على عالم الناس اللي أكبر مني واللي دايما كنت عايزة أعرفه ويمكن دايما كنت بحس لما نتكلم اني اكبر من عمري بشكل كبير......!!! أما عمرو -ابن خالتي التانية-، فـ كنت بحب انه طيب الطيبة اللي بتحولك لإنسان طيب... كان أكبر مني بفرق حلو فـ نظري، على الرغم ان مافيش حاجات كتير مشتركة ما بينا، أهم حاجة بتميز الموضوع هو ان دايما كانوا اهلنا بيقولوا عمرو لرحمة ورحمة لعمرو، و ده طبعا مش من فراغ، لكن كان لعمرو اخين اصغر منه وانا ليا اختين اصغر مني، فكانت التقسيمة العدل كالتالي، عمرو لرحمة، وأحمد لسلمى، واسلام لدينا.... الكبير للكبيرة و الوسط للوسطانية و الصغير للصغيرة........هلس يعني

 وفـ الحقيقة إن اخواتي البنات كمان كانوا بيحبوا شريف وتامر، ونادين اللي ساكنة فـ العمارة اللي جنبينا بردو كانت بتحب شريف.. في الحقيقة ان الحب عندنا فعلا كان حالة مشتركة ساعات يبقى فيها غيرة من بعض، وفي الأواخر بدأت حالة التقسيم عشان بدأنا نفهم ان مافيش حب بالمنظر "المكعبر" ده.....!!!
و نظرا لأن الانسان بطبعه بيتطور، بدأت مرحلة اعدادي بعزلة غريبة عن كل الاشخاص دي، فجأة اللعب فـ الشارع بقى شكله مختلف، بقى فيه خروجات، فيه اصحاب بنات كتير و "ودودة" اكتر عن حاجات كتير بتتغير فـ حياتنا، واللي طبعا مش غريب ان فجأة بقت نظرتي لكل السطور اللي فوق نظرة شخص عاقل جدا وبيعترف ان عمره ما حب وان الحب اكيد مش كده!!!!!!!!

ليست هناك تعليقات:

إرسال تعليق